Ruhiy tiniqish, Alloh bilan bandasi o'rtasidagi aloqalarni yaxshilash uchun ba'zan yolg'iz qolish lozim. Tarixga nazar solinsa, payg'ambar, valiy, ulug' shaxslar hayotining ma'lum vaqtlarida o'zini anglash, tiniqish, ruhan hozir bo'lish va yuksalish uchun uzlatga chekinganini ko'rish mumkin. Har bir insonning o'z olamida uni qiyin vaziyatga soladigan turli "boshog'riq"lari uchrab turadi. odatda ular psixologik yoki nafsiy kelishmovchilik oqibatida yuzaga keladi. Viruslar kompyuterning ishlashiga qanchalik zarar bersa, kishidagi ichki tortishuvlar ham hayotining bir maromda davom etishiga shunday to‘sqinlik qiladi. Kompyuterga tushgan viruslar tarqalib ildiz otsa, uni darxol o‘chirib, ya’ni faoliyatdan to‘xtatib, ta’mirlashga beriladi. Toki viruslardan to‘la tozalanmaguncha ustaxonada qoldiriladi. Ba’zan uni butkul qayta isloh qilishga to‘g‘ri kelishi ham mumkin... Inson ham vaqti-vaqti bilan faoliyatdan chetlanib, yolg‘iz qolishi, botiniga tushgan «virus»lardan tozalanishi, o‘zini isloh qilib olishi lozim.