Haq taoloning so‘nggi elchisi Payg‘ambarimiz sollallohu alayhi vasallam hayotlarini aks ettiruvchi turfa asarlar dunyoning turli tillarida yozib kelinadi. Ushbu asar ham mashhur ingliz yozuvchisi Martin Lingsning Payg‘ambarimizga bag‘ishlovidir. Islomni qabul qilgach, Abu Bakr Sirojiddin ismini olgan olimni "yangi zamon darveshi" deb ham atashgan, uning "Hazrati Muhammad sollallohu alayhi vasallamning hayoti” nomli asari ancha mashhurdir. Bu asar eng ko‘p bosilgan va eng ko‘p sotilgan asarlar sirasiga kiradi. Chunki ushbu kitob 1983-yilda dunyo yuzini ko‘rgan bo‘lsa, o‘ttiz yildan buyon har yili qayta-qayta nashr etib kelinadi, dunyo musulmonlari qo‘lida sevib mutolaa qilinadi. Bu asar Pokistonda o‘tkaziladigan "Siyrat" tanlovida "Eng yaxshi kitob" deb e’tirof etilgan. Abu Bakr Sirojiddin (Martin Lings) qalamiga mansub asar Payg‘ambarimiz hayotini yorituvchi, xalqaro miqyosda e’tirof etilgan, keng qamrovli va zamonaviy uslubda yozilgan tarixiy-diniy romandir.