Бу китоб буюк ватандошимиз, улуғ муҳаддис олим Абу Исо Муҳаммад ибн Исо ат-Термизийнинг (209/824 - 279/892) тўплами «Сунани Термизий»нинг кўп жилдлик шарҳидир. Расулуллоҳ соллаллоҳу алайҳи ва салламнинг ҳадиси шарифлари асрлар бўйи юртимиз мусулмонлари амал қилиб келган мотуридия ақидаси ҳамда ҳанафий мазҳабига мувофиқ изоҳланган. Асарнинг ўзбек тилига тўлиқ академик таржимаси, ҳадисларнинг илмий-изоҳли шарҳи қўлёзма ва тошбосма ҳамда замондош олимлар шарҳларига асосланган ҳолда илк бор нашр этилмоқда. Биринчи жилд «Муқаддима» қисми бўлиб, унда Имом Термизийнинг илмий фаолияти, ҳадис илми тарихи ва ҳадис истилоҳлари, «Сунани Термизий» асарининг шарҳлари ҳақидаги маълумотлар ўрин олган.