Бугунги кунда юртимизда фазилатли шайх Муҳаммад Содиқ Муҳаммад Юсуф ҳазратларининг асарлари кириб бормаган хонадон йўқ ҳисоб. У зотнинг китоблари қўшни давлатларга, ҳатто Россияга, Жанубий Кореяга ҳам экспорт қилинмоқда, рус, инглиз, олмон тилларига таржима қилинмоқда. Улуғ алломамиз охират дунёсига риҳлат қилганларидан кейин у кишининг шахсларига, ҳаёт йўлларига бўлган қизиқиш янада ортди. У киши ҳам ҳамма қатори мактабда, мадрасада, олийгоҳларда ўқиганлар, аммо қандай қилиб бу қадар олий даражаларга эришганлар? Ҳаёт синовларидан қандай ўтганлар? У зотнинг ота-оналари қандай инсонлар бўлишган? Оилалари, фарзандлари-чи? Ушбу саволларга ҳазратнинг болаликларидан то ҳаётларининг сўнгги дамларигача бирга бўлган, ҳаёт ташвишлари ва қувончларини бирга бошидан кечирган укалари Муҳаммад Амин Муҳаммад Юсуф баҳоли қудрат жавоб берганлар. Ушбу хотираларни ўқиб, бу буюк инсонни ўзингиз учун яна бир бор кашф этасиз деган умиддамиз.