Ушбу китоб муаллифи Муҳаммад Зако Кўнрапа 1888 йил Истанбулда туғилган. У адабиёт ва тарих соҳаларида ижод қилган. Ислом тарихи ва Расулуллоҳ соллаллоҳу алайҳи ва саллам сийратларига оид бир қанча мақола ва китоблар муаллифидир. Унинг сийрат ва одоб-ахлоққа доир ёзган китоблари мах- сус ислом билим юртлари учун ўқув қўлланма сифатида фойдаланиб келинмоқда. Ўзи ҳам шу билим юртларида дарс берган. 1969 йил 15 июнда Истанбулда вафот этган. Пайғамбаримиз соллаллоҳу алайҳи ва саллам сийратлари бўйича бир қанча китоблар ёзилган ва ёзилмоқда. Ҳар бир китобнинг ўзига хос услуб ва йўналиши бўлгани каби ушбу китобнинг ҳам бошқа сийрат китобларидан ажралиб турадиган фарқлари бор. Бунда Ислом тарихида бўлиб ўтган воқеалар қисқа ва тушунарли услубда ёзилган. Ўқувчи ўқиш давомида чалғимаслиги учун изоҳ ва шарҳлар ҳар бир мавзудан кейин алоҳида келтирилди. Ушбу китоб кенг китобхонлар оммасига мўлжалланган.