Siz tush ko'rasizmi, ey o'quvchim? Ayrim paytlar xuddi tush olamida yashayotgandek bo'lasizmi? Tunning eng sokin, eng xilvat, eng xoli payti yonog'ingizda qulog'ingizga qarab oqayotgan ikki tomchi ko'z yosh bilan uyg'onib ketganmisiz? Bu olamning tushdan iborat ekaniga ishonasizmi? Keling, boshqa birovning tushiga quloq solaylik. Haqiqatni ko'ra olaylik. Parvonaga aylanaylik. Badanimizni yoqqudek olov qidiraylik. Qora ipakdan yasalgan qanotlarimiz bilan avvalambor Sheroz tarafga parvoz qilaylik va otashni tushunadigan, muhabbatga to'la insonlar davrasiga qo'naylik. Tilsiz, tovushsiz, hatto harfsiz so'zlar ila: "Muhabbat otashdir," - deb ayta olaylik. Muhabbat uchun yona olaylik, otashga sabr qila olaylik. Keyin bu qora badanimizni Mavlono dargohiga olib kelaylik va bizni kuydiradigan biror sham izlaylik. Muhabbat qidiraylik. Faryodimizni osmonu falakka yetkazaylik. Muhabbat yo'lida ko'z yosh to'kaylik. Keyin esa tog'ning uchida duo qilayotgan Yunusni qidirib topaylik. Istasangiz, undan muhabbat haqida so'raylik va uning muhabbatiga o'zimiz guvoh bo'laylik. Muhabbat haqida uchta oshiqdan tinglaylik.