Islom olamining navqiron ulamolaridan doktor Oiz al-Qarniyning «Mahzun bo‘lma» («La tahzan») kitobi nihoyat foydali bir mavzudan bahs etgani sababli o‘quvchilar tomonidan qizg‘in kutib olindi va qayta-qayta, bir necha million nusxada nashr qilindi. Kitobda musannif Qur’oni karim oyatlari, hadisi sharifdan iqtiboslar va sahobayu tobeinlar hayotlaridan ibratli lavhalar keltirish bilan hamda o‘ta ta’sirli hikmatlarni misol qilib, o‘quvchini mahzun bo‘lmaslikka – insonligi uchun, mo‘min-musulmonligi uchun, benihoya Mehribon Ollohning bandasi, eng Buyuk Inson, sevikli Payg‘ambarimiz Muhammad sollallohu alayhi vasallamning ummati bo‘lishdek ulug‘ saodatga ega bo‘lgani uchun sevinib, shukronalar aytib, baxtiyor hayot kechirishga da’vat qiladi. Jozib til va go‘zal uslub bilan bitilgan ushbu asarni o‘qib, olgan rohatlarimizni, Siz aziz dindoshlarimiz bilan baham ko‘rish niyatida, «Mahzun bo‘lma» kitobining bir juz’ini farzandi arjumandimiz Zahiriddin tarjimasida e’tiboringizga taqdim qilinmoqda. Olloh barchamizga hayoti dunyoda ham, Oxirat diyorida ham mahzun bo‘lmaslik baxtini ato etsin.