Oisha roziyallohu anhoning hayoti va faoliyati muslima ayollar uchun haqqoniy timsoldir. Mazkur kitobning nomini "Hazrati Oisha" deb atadik. Bu zavjai mutahhora tom maʼnoda Paygʼambarimizning habibasi va suyuklisi edi. Hadis toʼplamlarida rivoyat qilingan hadisi shariflar ham bu soʼzimizni tasdiqlaydi. Bu onamizni koʼrib, suhbat va maslahatlarini olgan sahobai kiromlar ham Rasulullohning habibasi, degan taʼrif unga naqadar munosib va loyiq ekaniga tan berganlar. Nega bu ayol Paygʼambarimiz tomonidan oʼzgacha ardoqlandi, degan savolga javob qidirib koʼraylik. Mazkur kitob bilan tanishish davomida muhtaram oʼquvchilar bu savolga javob topadilar, deb oʼylaymiz.