Эркак ҳам, аёл ҳам ўзига қараб юриши зарур. Турмуш қуришдан олдин бир-бирига чиройли кўриниш учун имкон қадар ўзига оро берганлар тўйдан кейин ўзига қарамай қўяди, ҳатто ёнма-ён ўтирмай, телефон ёки телевизордан бош кўтармайди. Тўйдан олдин пардоз-андозсиз юрмаган аёл тўйдан кейин юзини ювишга ҳам эринадиган бўлиб қолади. Ваҳоланки, ўша пардоз-андозни уйда эрига кўрсатиши керак эмасми?.. Тўйдан олдин ҳар бир ҳаракатига эътиборли бўлган эркаклар эса кейинчалик телевизорнинг рўпарасида ухлаб қоладиган одамга айланади. Бундай оилада саодат бўлиши мумкинми?.. Эр-хотиннинг орасидаги бундай бўшлиқни совуқликдан бошқа нима тўлдириши мумкин?.. Ё Раб! Бизни ўзлигимизга қайтар! Икки кўнгилнинг баробарлиги билан неъматлантирилганларга уйларидаги ҳузурни эслат.