Keyingi asrlarda hadislar atroflicha o‘rganildi, bu sohada turli yo‘nalishlar paydo bo‘ldi, son-sanoqsiz kitoblar yozildi, sharhlar bitildi, tarjimalar qilindi. Jumladan, hadislarning turlari aniqlandi, ularni ruhiy tarbiya mashoyixlari o‘z yo‘llari bilan, faqihlar o‘z yo‘llari bilan, tarixchilar o‘z uslublari bilan, boshqa sohalarning olimlari ham o‘z sohalariga xos yo‘l va uslublar bilan batafsil o‘rgandilar. Sahih hadislarni alohida, hadisi qudsiylarni alohida, va’z-nasihatga oid hadislarni alohida, ilmga oid hadislarni alohida, silai rahmga oid hadislarni alohida va shunga o‘xshash boshqa sohalarga tegishli hadislarni ham alohida o‘rganish ishlari yo‘lga qo‘yildi.