Dunyoga kelgan har bir insonning umri vaqt koʼrinishida toʼxtovsiz oʼtib boradi. Bu dunyodan ketish muddati yetganda unga boʼysunib, dunyoni tashlab ketishdan oʼzga chora qolmaydi. Ketish vaqti esa bugunmi, ertami qachon kelishi insonga nomaʼlum. Deyarli har kuni "Falonchi vafot etibdi", degan xabarni eshitamiz. Bir kun kelib biz haqimizda ham "Falonchi vafot etibdi", deyiladi. Oʼsha kunda odamlar: "Falonchi nima qoldiribdi?" deyilsa, farishtalar: "Falonchi nima olib kelibdi?" deyishadi. Oʼsha vaqtda esa dunyo bizdan boʼshab qolgan, bizning esa oxiratimiz boshlangan boʼladi.