Qurʼoni karimda marhamat qilinishicha, Аlloh taolo oʼzi suygan, yaqin bandalariga hikmat ato qiladi. Kimga hikmat berilgan boʼlsa, unga koʼpgina yaxshiliklar ato qilinibdi. Muallif Аbdulqodir Samarqandiy (Polvonov)ni ana shunday hikmat ato etilgan insonlardan deyish mumkin. Bugun ijtimoiy tarmoqlar orqali u kishini koʼpchilik yaxshi taniydi, uning oʼylashga, tafakkurga chorlovchi hikmatli soʼzlari, ulugʼlar hayotidan keltirgan ibratli rivoyatlarini sevib mutolaa qiladi. Ular eskirmaydi, qayta-qayta oʼqigan kitobxon ham zerikmaydi. Bu hikmatlar, rivoyatlardan internetga kirmaydigan keng kitobxon ommasining ham bahramand boʼlishlarini istadik. Qoʼlingizdagi kitob ana shu maqsadda yuzaga keldi. Bu kitobni asalga oʼxshatish mumkin. Аsalari guldan gulga qoʼnib, rango-rang iforlaru anvoyi shiralardan shifobaxsh asal toʼplagani singari, muallif ham turli manbalardan turfa hikmatlar va taʼsirli rivoyatlarni tergan, baʼzilariga oʼzining xulosalari-ni ham ilova qilgan. Shu sababdan ham kitobni oʼqirkansiz, ketgan vaqtingizga achinmaysiz, aksincha u sizning kundalik hamrohingizga aylanib qoladi.