Китоб кўп йиллар мобайнида "Тошкент ҳақиқати” ва “Ташкентская правда" газеталарида босилган мақолалардан иборат бўлиб, Тошкент воҳасининг қадимий карвон йўллари бўйлаб саёҳат қилиш имконини беради. Зеро китобга ўтган аср ўрталарида амалга оширилган илмий ишлар хулосалари, археология экспедициялари ҳисоботлари асосида Тошкент воҳаси халқи хотирасида сақланиб келаётган афсона ва асотирлар жамланди. У таъбир жоиз бўлса, муаллифнинг қарийб қирқ йилдан зиёд муддат давомида кўриб, ҳис этган туйғуларининг, таассуротларининг ўзига хос инъикосидир. Назаримизда ушбу мажмуа кўплаб янги тадқиқотларга манба бўлиб хизмат қилади. У кенг китобхонлар оммаси, элшунослик, тарих соҳасига қизиқувчилар, шунингдек, олий ўқув юртлари тарих ва этнографиядан сабоқ олаётган талабалар, айниқса, тадқиқотчилар учун қимматли қўлланма бўлади, деб ишонамиз.