Ватан тарихини билиш ўз яқинларингни, шажарангни, қўшнингни, ўзинг таваллуд топган макон тарихини билишдан бошланади. Билганда ҳам юзаки эмас, сени тарбиялаган, униб ўстирган ўлка ва халқ маданиятининг ташувчисига айлангунча англаш ҳар биримизнинг муқаддас бурчимиздир. Муаллиф асл касби геолог бўлса-да, она Ўзбекистон давлатчилигидаги бизга ҳали кўп аён бўлмаган қадимги Илоқ давлати, Оҳангарон водийси тарихи, этнографияси, жой номлари, эл-элатлари, уруғ ва тўплари, улар вакиллари ҳақида ҳикоя қилади. Хусусан, унда Оҳангарон тумани, Ангрен ва Оҳанганрон шаҳридаги жами 150 дан зиёд қишлоқлар, 74 зиёратгоҳ, 16 қўрғон, 9 та карвонсарой ва работлар ҳақида маълумотлар жамланган. Ушбу сермеҳнат тадқиқот шу вақтгача ушбу мавзуда ёзилган юзлаб манбаларга таянилгани, у ердаги факт ва рақамлар, илмий ғоя ва тафсилотлар ривожлантирилгани билан ҳам ғоят қимматлидир.