Ўзбекистон фан арбоби, филология фанлари доктори, профессор Ҳафиз Абдусаматов фақат адабиётшуносликдагина эмас, балки театршуносликда ҳам катта ишлар қилган. У юзга яқин спектаклларга пухта тақризлар ёзган. Олимнинг бу жабҳадаги энг жиддий иши халқ артисти, давлат мукофотларининг совриндори Зикир Муҳаммаджонов ҳақидаги илмий-назарий тадқиқотидир. Бу монографияда санъаткорнинг театр ва кино соҳаларидаги улкан ижодий хизматлари кенг ва чуқур таҳлил қилинган. У яратган ҳар бир баркамол образнинг маданий ҳаётимиздаги роли ва аҳамиятини ёрқин очиб беришга етарли ўрин ажратилган. Китобда булардан ташқари Зикир Муҳаммаджоновнинг санъат хусусидаги назарий-бадиий қарашлари унинг асарлари асосида ҳар томонлама тадқиқ этилган. Бу асар маданият ва санъат институтлари ва олий ўқув юртлари филология факультетлари талабалари ҳамда санъат аҳлига муносиб туҳфадир.