Xurshid Davron qalamiga mansub "Bibixonim qissasi" va "Sohibqiron nabirasi" asarlari Bibixonim hamda Mirzo Ulug'bek haqida hikoya qilish bilan birga, Temuriylar davriga oid tarixiy faktlar va xalq orasida og'izdan og'izga ko'chib yurgan afsonalardan so'zlaydi. Muallif an'anaviy tarixiy nasr uslubidan chiqib, rivoyat, afsona va badiiy tasavvurlarni uyg'unlashtirgan holda, o'quvchini o'tmishga - Vatanimiz kechmishiga sayohat qilishga chorlaydi. Ushbu kitobda joy olgan tarixiy-ma'rifiy qissalar o'qirmanni Temuriylar davrining betakror muhitiga olib kirib, tarix va badiiyat chegarasida yo'qolib ketgan haqiqatlarni qayta kashf etishga, afsona va rivoyatlarni mushohada qilishga undaydi. Asar tarixiy bitiklarni sevuvchilar, Amir Temur siymosi bilan qiziqadigan kitobxonlar va milliy adabiyot ixlosmandlari uchun ajoyib armug'ondir.