«Терговчи» сериясининг навбатдаги асари ҳукмингизга ҳавола қилинаётганидан мамнунмиз. Қиссада мавзу марказига олинаётган ор-номуснинг топталиши қандай салбий оқибатларга олиб келиши, бир кишининг нотўғри хатти-ҳаракатлари ортидан турли-туман қабиҳликларга қўл урилиши ёритилган. Шунингдек, жиноят содир этувчилари қанчалик пухта тайёргарлик кўрган бўлишмасин уларни топишда асар бош қаҳрамонлари Фахриддин ва Санжарбеклар ҳамда тезкор-тергов гуруҳи фаол аъзоларининг саъй-ҳаракатлари бесамар кетмаганлигининг гувоҳи бўламиз. Китобни ўқиш давомида, бир тарафдан, жамиятнинг айрим аъзолари билиб-билмай нотўғри йўлларга кириб қолаётганлиги, уларнинг ахлоқ, тарбия, хулқу савияси қай даражада тубанлашиб кетганлиги ва бунинг натижасида юзага келаётган бахтсизликлар вужудингизда оғриқ ҳосил қилса, иккинчи тарафдан, сизу бизни ҳушёрликка, ён-атрофда бўлаётган ҳодисаларга бефарқ бўлмасликка чорлайди. Ушбу асар детектив ихлосмандлари ва кенг китобхонлар оммасига мўлжалланган.