Эл ичида яшаб, элнинг ҳаёти, курашлари, шодлик ва қайғуларидан четда туриш мумкин эмас. Жамият ҳаётининг мавжуд долғалари ҳамма замонларда ҳам шеърият аҳли юрагида акс этган. "Қалб садоқати" китобига Ватан Истиқлолигача бўлган йилларда битилган, шоир юрагининг изтиробларини, орзу-умидларини акс эттирувчи мулоҳазалар, баҳслар, адабий ўйлар киритилди. Бу рисолаларда сиз эрксизликка қарши исённи ҳам, элу юрт меҳрини, ёруғ келажакка ишонч ҳисларини, озодлик маслагига садоқат туйғуларини ҳам сезишингиз, жамиятимиз босиб ўтган йўлларнинг осон бўлмаганини ҳис қилишингиз мумкин.