XX asr jahon adabiyotining yorqin namoyandalaridan biri — Frans Kafka ijodi kitobxonlarda katta qiziqish uygʻotib kelmoqda. Uning roman, qissa va hikoyalarida oʻz davrining oʻtkir siyosiy, huquqiy, ijtimoiy muammolari, inson ruhiyatining eng murakkab qirralari, oddiy odamlarning fojiaviy qismatlari yuksak mahorat bilan betakror usulda tasvirlangan. Frans Kafka asarlari Gʻarbda nihoyatda mashhur. Yozuvchi asarlari asosida koʻplab kinofilmlar yaratilib, spektakllar sahnalashtirilgan. Qator mamlakatlarda Frans Kafka jamiyatlari faoliyat olib boradi, uning nomida bir nechta adabiy mukofotlar taʼsis etilgan. Pragada Frans Kafka muzeyi ham faoliyat koʻrsatadi.