Аziz kitobxon, qo'lingizdagi ushbu asar jurnalistning yigirma besh-o'ttiz yillik faoliyati va qisman hayotining sahifalardagi aksi. Аyni paytda, tarixan qisqa mana shu davr mamlakatimizning ijtimoiy-iqtisodiy va maʼnaviy-axloqiy hayotida tub burilish - mo'rt poydevorga qurilgan yolg'on sotsialistik tuzumning bozor iqtisodiyotiga asoslangan mustahkam tuzum, sarob kommunistik jamiyatning real huquqiy-demokratik davlat bilan almashinuvi, soxta «suveren» respublikaning haqiqiy mustaqil mamlakatga o'sib o'tishiga to'g'ri kelganligi bilan eʼtiborlidir. Аsar kechagi tarixan qisqa va mazmunan salobatli davrni har tomonlama yoritib borishni daʼvo ham, maqsad ham qilmaydi. Bu, kasb taqozosi bilan ushbu tarix ichida turli ko'cha va eshiklarga kirib chiqqan, yaxshi-yomon manzaralarni o'z ko'zi bilan ko'rgan, hayot va huquq so'qmoqlarida kezgan muxbirning badiiylashtirishga uringan taassurotlari, kechinmalari bo'lib, ular bugungi nurafshon kunlarga qanday og'ir mashaqqatlar bilan erishilganini tasavvur etishingizga asqatadi, deb o'ylaymiz.