Muhabbatdan nafratgacha masofa bir qadam, deyishadi. Аmmo nafratdan muhabbatgacha bo'lgan yo'l-chi? Bu yo'l Marg'ibdan Mashriqqachami yoxud yer bilan osmonchami? “Sehrli diyor”da yashab ijod etuvchi Syuzen Foks o'z asarlarida asosan hayotiy voqea-hodisalar vositasida ko'ngil masofalarini qahramonlari bilan birga bosib o'tishga urinadi. Muallifning “Samoviy ahdu paymon” nomli romanida ham ushbu mavzu qalamga olinib, kitobxonni befarq qoldirmasligi tayin. Negaki asar anʼanaviy qisqa roman shaklida bitilgan bo'lib, unda ortiqcha gajak-bezaklarsiz, badga urmaydigan tarzda voqealar rivoji, qahramonlarning o'y-kechinmalari hamda tuyg'ular tarbiyasiga urg'u beriladi.