Odamzot tortishish kuchini yengishga chogʻlanib yaratgan ajabtovur qurilmalar haqidagi hikoyalarni ko'hna afsonalar, rivoyatlar va, hatto, muqaddas kitoblarda uchratish mumkin. Qadim-qadimdan olimlar qushlar-u uchar hasharotlar qanday qilib havoda uchib yurishini anglab yetish uchun ularning parvoz mexanizmini, tanasi va qanotlari tuzilishini sinchiklab o'rganganlar Dastlabki parvoz qurilmalari uchun, aynan qush qanotlaridan andaza olingani ham bejiz emas. Ularni, hatto qalin patlar bilan qoplab ham koʻrishgan. Tabiiyki, bunday qurilmalar yordamida odam parvoz qilish tugul, yerdan koʻtarilishi ham amri mahol ekani endi hech kimga sir emas. Ba'zi ixtirochilar oʻzlarining yerning tortishish kuchini yengish, bulutlarga koʻtarilish va olamni qush parvozi balandligida koʻrish orzusini amalga oshirish uchun hatto oʻz oilalari, boyliklari, obro'si va farovon hayotini ham qurbon qildilar. Afsuski, ulardan aksariyati oʻz orzusiga erisha olmadi: ixtiro etilgan qurilmalar hisobkitoblardagi xatoliklar yoki bir qator muvaffaqiyatsizliklar tufayli parvoz qila olmagan. Hukumat vakillari ham bunday sinovlarni juda xavfli deb hisoblashgani uchun taqiqlab qoʻyishgan, toʻgʻrisini aytganda, odamzot samolarda parvoz qilishi mumkinligiga deyarli ishonishmagan. Agar hamma birdek xayolparast, gʻirt bekorchi va nodon deb hisoblagan ashaddiy ishtiyoqmandlar boʻlmasa, uchish qurilmalari biz odatlanib qolgan transport vositasiga aylanishi ehtimoldan yiroq edi. Axir, barcha muvaffaqiyatsizliklar-u xatoliklar aviatsiya va havoda uchish jarayonlari rivojlanishi uchun yutuqlar va kashfiyotlardan kam bo'lmagan darajada muhim bo'lgan. XIX asrning o'rtalaridan boshlab, ilm-fanning turli sohalarida yangi kashfiyotlar va ixtirolar yaratilishi oqibatida chinakamiga yerdan ko'tarila oladigan va, hatto bortida yo'lovchilarni tashiydigan qurilmalar vujudga kela boshladi. Kelinglar, samolyotlar va boshqa havo kemalari qanday qilib va nima uchun uchishini tushunib olamiz.