Qiyomat... Bu soʻz butun ogʻrigʻi bilan ongimizga taʼsir koʻrsatadi. Chingiz Aytmatov nom bergan va Ibrohim Gʻafurov tarjimasi bilan nashrga tayyorlangan mazkur kitobning ahamiyati xususida gap ketganda, asarning “Qiyomat” deb nomlanishida bir emas, bir nechta asos borligini taʼkidlash kerak. Chunonchi, Akbara bilan Toshchaynar timsolida bir juft boʻri va uning zurriyotlari qismatining fojeiy yakuni; ummatlariga baxt ato etish uchun kurashgan, alaloqibat aynan oʻsha baxt ulashmoqchi boʻlganlar tomonidan rad etilgan hazrati Isoning chormixga tortilishi; oʻzlarini jamiyatning oldi kishilari deb bilgan, aslida esa maʼnan nopok kishilarga qarshi soʻz aytgani uchun Moʻyinkum dashtida daraxtga chormix qilib tortilgan Avdiy kallistratovning fojiali oʻlimi; Ola Moʻngu togʻidagi tubsiz jarlikka oti bilan tushib ketgan va hatto kafansiz qolgan ernazarning qismati; qoʻrquv va tahlikaning zoʻridan Kenjashni olib ko'chayotgan Akbarani otaman deb aslida oʻz jigarporasining bagʻrini oʻq bilan ilma-teshik qilib yuborgan Boʻston Oʻrkunchiyev taqdiri - bularning bari kitobxon qalbini larzaga solmay qoʻymaydi.