Ulug‘bek Hamdam “Yolg‘izlik" qissasining mohiyatida ham xuddi romanlaridagidek insonning o‘z ichki olamini, ruhiyatini tahlil qilishi asosiy o‘rin tutadi, ammo bu qissaning qahramoni "Yolg‘iz". Uning ismi, o‘tmishi ham, maqsadi-umidi ham, ertangi kuni ham "Yolg‘iz". Inson hayotida yolg‘izlikning qanchalar katta ahamiyatga va bemisl kuch-qudratga ega ekanligi asar boshlanishidan to oxirigacha batafsil yoritilgan. Muallif insonlarning ko‘nglini, qalbini, dunyoqarashini risoladagidek yoritishga shunchalar uringanki, kitobxon bu asarning badiiy asar ekanligiga shubhalanib qoladi. Asar qahramoni haqida gapiradigan bo‘lsak, xuddi asar nomidek mavhum: ismsiz, kimligi noma’lum, lekin oilasi bor... Asarni o‘qir ekansiz, "Yolg‘izlik”ning ismsiz, qiyofasiz, qahramonini makonsiz, zamonsiz arosatga tushib qolgan odamga o‘xshatasiz! Ha, asardagi barcha mulohazalar, o‘y- fikrlar arosatda qolgan insonniki ekanligi shubhasiz.