Ushbu kitobni mutolaa qilar ekansiz, Fitratning yurti kelajagi uchun qanchalik qayg‘urib, iztirob chekishini yaqqol sezasiz. O‘sha davrda Buxoro amirligi juda keng maydonda hukmronlik qilgan edi. Fitrat ilm-fan va sog‘liqni saqlashning orqada qolish sabablarini mullalar, mufti va amirlarning ilmga bo‘lgan befarqligi, mansabparastligi va poraxo‘rligida deb hisoblaydi. U bu illatlarni yuksak mahorat bilan fosh qilib, ma’rifat chirog‘ini yoqish orqali qorong‘ilik va qo‘rquvdan qutulish yo‘llarini izlaydi. "Hind sayyohining qissasi" da Fitrat ma’rifat haqidagi fikrlarini bayon etar ekan, Buxoro amirligidagi adolatsizliklarni chuqur tahlil qilib, dalillar asosida taqqoslaydi va umumlashtiradi. Uning samimiy va dardli so‘zlari o‘quvchida kuchli taassurot qoldiradi.