Yosh yozuvchi Ruxsora Nurning hikoyalarida turfa mavzular qalamga olinadi. Uzoq o‘tmishdagi ibtidoiy hayot tarzining mifologik talqinlaridan tortib zamonaviy insonning ruhiy kechinmalari, og‘riqlarigacha bo‘lgan uzun yo‘lni bosib o‘tasiz mutolaa davomida. Yozuvchi ko‘pgina hikoyalarida o‘zbek ayolining iztiroblari bilan yuzlashadi va bu iztiroblarni goh biroz piching, goh biroz kinoya va katta hamdardlik bilan yoritadi. Aynan shu sabab hikoyadagi dard ustida o‘yga tolasiz-u, yuragingiz toliqmaydi, yozuvchi sizni shu tarzda hayotning qorong‘i tuyumlaridan ko‘nglingizga andak yuqtirib, ammo qalbingizni muhofaza qilgan holda olib o‘tadi.