Har bir inson tanlagan sohasida yuqori marralarni zabt etishni istaydi. Qalblarni bunday orzu junbishga keltirishi tabiiy hol. Bolalikdagi cheksiz orzularimiz ulg‘ayganimizda turli o‘zgarishlarga uchraydi, chunki endi teranroq fikrlaymiz va yashayotgan muhitimizda nimalar qo‘limizdan kelishini inobatga olamiz. Biroq nima bo‘lgan taqdirda ham faoliyatimizda muvaffaqiyat qozonish orzusini bir dam bo‘lsin chetlamaymiz. Albatta, ko‘ngilda yaxshi orzular bo‘lishi yoqimli, ammo ularni qay yo‘sinda haqiqatga aylantiramiz? Javob oddiy: tajriba orttirib, ularni puxta tuzilgan rejamizda samarali ishlatgan holda natijaga erishamiz. Tajriba esa, yillar davomida mashaqqatli o‘tgan amaliy harakatlar yoki nazariy bilimlarni oqilona o‘zlashtirish orqali hosil bo‘ladi. Ushbu kitobda muallif Ali Abdaal o‘zining hayotiy tajribalarini siz aziz kitobxon bilan bo‘lishadi. To‘g‘ri, asarda keltirilgan ma’lumotlarni hayot tarzingizga moslashtira olmasligingiz mumkin, biroq ularni tahlil etgan holda o‘zingizning noyob qirralaringizni kashf etishda amaliy ko‘nikmalarga ega bo‘lishingiz mumkin. Sizni jiddiy kitob mutolaasiga taklif etayotganimizdan xursandmiz!