Унинг мақсади эзгу эди. Ўрта мактабни битиргач, пойтахтга кетиб, университетда ўқиб, адабиёт аталмиш сеҳрли олам сирларини мукаммал ўрганиш эди. Бу мақсадларига у тўла-тўкис эришди. Аммо ундан аввал... тақдирнинг жуда оғир синовларига дуч келди. Иккинчи жаҳон уруши бошланиб, омонсиз жангларда иштирок этди. "Ақл бовар қилмас кўргиликларга дуч келдим, мудҳиш жиноятларга гувоҳ бўлдим, ёвуз дунё билан юзлашдим..." дея оғриқли сўзлар билан бошлайди у кейинчалик фронт хотираларига бағишланган "Юрак дарди" асарини. "Ёвуз дунё билан юзлашган" снайпер-жангчи атоқли адиб ва адабиётшунос олим, Ўзбекистонда хизмат кўрсатган фан арбоби ва яна кўплаб давлат мукофотлари, орден, медаллари соҳиби, академик Матёқуб Қўшжонов қаламига мансуб мазкур роман ҳаёт аталмиш буюк неъмат табиатига мутлақо зид бўлган бешафқат урушлар, хунрезликлар оқибатини ҳаққоний лавҳалар- да очиб берган бадиий айбнома сифатида ўқирманда чуқур таассурот қолдириши шубҳасиз.