"Қуёшдаги одамлар" ҳаётини яхшилаш умидида чўлни кесиб ўтишга аҳд қилган уч боёқишнинг фожиали ҳикояси. Улардан бири ҳаёт ташвишлари елкасини букиб қўйган, аммо ҳамон бардоши бақувват кекса деҳқон, иккинчиси ноҳақликка йўқ дегани учун қочишга мажбур бўлган йигит, учинчиси эса ўқишни ташлаб, ҳаёт машаққатларини ҳис этиб кўришга чоғланган талаба. Уларни бой ўлка саналмиш Кувайтга етиб олиб, мўмайгина пул топиш ва оилаларининг тақдирини ўзгартиришдек ягона мақсад бирлаштиради. Аммо бу йўл қуёш тиғида ёнаётган чўл орқали ўтади... 1963 йилда ёзилган бўлишига қарамай, Ғассон Канафонийнинг ушбу асари саҳифаларидан садо бераётган товуш ҳамон баралла янграмоқда. Бу роман саҳроларда ҳалок бўлган, денгизларда чўккан, юк машиналари ёки учоқларнинг пана бурчакларида нафаси сиқиб, музлаб жони узилган ва узилаётган минглаб муҳожирлар тақдирига кўзгу тутувчи асардир.