Luqmon Bo‘rixon - o‘quvchilarga ko‘proq qissanavis sifatida tanilgan yozuvchi. Uning qalamiga mansub "Xizr ko‘rgan yigit", "Qidiruvdagi qiz", "Sirli muallim", "Bir tomchi yosh" singari qissalar o‘tkir syujeti, betakror insoniy taqdirlar aks ettirilgani, tilining jozibadorligi, tasvirning samimiyati, eng muhimi, qahramonlar ruhiyatining sof o‘zbekcha ifodalangani bilan kitobxonlarni o‘ziga rom etadi. "Quyosh hali botmagan" qissasidagi tasvir shu qadar jonli va yuqumliki, o‘quvchi beixtiyor o‘zini qahramonlar aks ettirilayotgan vaziyatga tushib qolganday, ular bilan birga yashayotganday his qiladi. Qissada bir-biriga ham do‘st, ham raqib bo‘lmish ikki o‘spirin yigitning g‘oyat o‘xshash va ayni vaqtda, o‘ta farqli shaxsiyatiga xos jihatlar juda nozik aks ettiriladi. Qissaning tili g‘oyat ta’sirli va shirali ekani bilan e’tiborni tortadi. Yozuvchining ushbu kitobidan o‘rin olgan qissa va hikoyalar sizni g‘aroyib taqdirli, ruhiyat dunyosi xilma-xil tirik odamlar bilan uchrashtirib, ularning dard-u quvonchlari, fikr-u o‘ylari bilan oshno qiladi. Bu timsollar bilan uchrashuv hamda ularning o‘ziga xos taqdir yo‘li bilan tanishuv, shubha yo‘qki, o‘quvchi ruhiy olamida tozarish yuz berishiga xizmat qiladi.