Abdulhamid Sulaymon o‘g‘li Cho‘lpon XX asr boshlaridagi o‘zbek tarjima maktabiga tamal toshi qo‘ygan, badiiy tarjima sohasining yalovbardori edi. U jahon adabiyoti durdonalarini o‘zbek tiliga mahorat bilan o‘girgan, o‘zbek kitobxonlarining jahon adabiyoti bilan tanishishida hissa qo‘shgan ulkan tarjimon edi. To‘plamga Cho‘lpon amalga oshirgan noyob badiiy tarjimalardan ba’zi namunalar ilk nashr asosida qayta tayyorlab kiritildi. Bu tarjimalarning ayrimlari XX asrning 20-30-yillarida nashr qilingandan buyon o‘quvchi bilan qayta yuzlashmagan. Bugungi adabiy va ilmiy jamoatchilik ham ko‘p-da bu tarjimalardan boxabar emas. Mazkur tarjima asarlar jadid namoyandasi Abdulhamid Sulaymon o‘g‘li Cho‘lpon tarjimonlik miqyosining kengligini ko‘rsatadi hamda bugungi kun kitobxonining ma’naviy ehtiyojlariga to‘la muvofiq keladi. Kitob filologlar, talabalar, adabiyotshunoslar, tarjimonlar, tadqiqotchilar, doktorantlar, filolog-o‘qituvchilar hamda keng kitobxonlar ommasiga mo‘ljallangan.