Боланинг иқтидорсизи бўлмайди, дейишади. Ота- онанинг эътибори, кўмаги ана шу мурғак иқтидор соҳибининг камолотига йўл очади. Шундагина бола Инсон, Шахс бўлиб камолга етади. Ҳар қандай жамият касбини севган, соҳасининг билимдони бўлган ана шундай Шахсларга, устозларга эҳтиёж сезади. Бундай фидойиларсиз тараққиёт бўлмайди, халқ миллат бўлиб шакллана олмайди. Ушбу китобда ота-онасининг эътибори туфайли санъатга ўз умрини бағишлаб, орзуларига садоқати боис юзлаб шогирдлар етиштирган, меҳнати ортидан қадр топган зиёли инсон шаҳрисабзлик Элмурод Боймуродовнинг ҳаёт ва ижод йўли ҳақида ҳикоя қилинади. Китобнинг илк бобида, қаҳрамонимизнинг болалик, талабалик, ёшлик йиллари, қайноқ меҳнат қучоғидаги фаолияти ҳақида сўзланса, иккинчи бобда унинг дўстлари, сафдошлари, шогирдлари, фарзанд ва набираларининг Э.Боймуродов борасидаги дил сўзлари, тилаклари ўрин олган. Ушбу китоб қаҳрамонининг ҳаёт йўли ўзига касб танлаш арафасида бўлган ёшларимиз учун ибрат намунаси бўлса не ажаб?