Жўра Бобораҳмат ўзбек журналистикасида ўз ўрнига эга иқтидорли ижодкорлардан. У қарийб 40 йилдирки газета ва журналларда, телевидениеда ўз камтарин ижоди билан иштирок этиб келади. Дастлаб ижодини фотожурналистикадан бошлаган Ж.Бобораҳмат Ўзбекистон телевидениесининг “Бир жиноят изидан”, “Одил судлов” каби кўрсатувлари орқали айниқса кўпчилик эътиборига тушди. Қуйидаги китобда Жўра Бобораҳматнинг, устозлари, машҳур санъаткор ва журналист дўстлари, ҳамкасблари, қишлоқдош ва синфдошлари ҳақидаги хотиралари ҳамда сафар таассуротлари, кўпчилик томошабинларда катта қизиқиш уйғотган жиноий ишлар тафсилотлари акс этган мақолалари жамланди. Унда муаллиф гоҳ ўзига хос юмор билан ҳангомалар айтиб кулдирса, гоҳ мудҳиш қотилликлар илдизини тадқиқ этиб сизни жиддий огоҳликка даъват этади. Мўътабар 60 ёшни қаршилаётган Жўра Бобораҳматнинг жавонингизни безайдиган беназир тўпламидан баҳраманд бўлинг.