Ушбу асар тарихимизда ўтган буюк аллома Имом Бухорийнинг ҳаёт йўлига бағишланган. Ёзилишида ўзига хос услуб қўлланилган, яъни воқеалар ривожи давомида ҳар бир тарихий шахс ҳақида манбаларда сақланиб қолган, мутахассислар томонидан текширувдан ўтган тарихий маълумотлар бериб борилган. Улар билан танишиб бориш ўқувчиларга ўша давр илмий ҳаёти кўламини ва ўша зотнинг олимлик даражасини ҳис этишда ёрдам беради. Ёзувчи ижодий жараёнда ўзи лозим топган сюжетларни куради, турли тўқималардан, тахминлардан ва фаразлардан фойдаланади. Шунинг учун бу бадиий адабиёт намунасидир. Ўқиш мобайнида, тарихий шахс ҳаёти айнан шундай воқеалар тизимидан иборат бўлган, деб ишониш шарт эмас. Имом Бухорий Халқаро Илмий Тадқиқот Маркази мутахассислари асарни синчиклаб ўқиб чиқиб, ўз тавсияларини берганлар.