Китобнинг "Ҳаёт муаллим" деб номланиши бежиз эмас. Чунки бизнинг ҳаётдан ўрганадиганимиз, оладиган таълимимиз ниҳоятда кўп. Бунинг учун барчамиз мавжуд имкониятларни бой бермай, ўз устимизда ишлашимиз, дунё ҳикматларини, ҳаётда кўрган-билганларимизни, воқеа-ҳодисаларни талқин қилиб, онгимизга сингдиришимиз, ўзлигимизни англашимиз, ўзимизни билишимиз керак. Ҳаётдан таълим олиш инсонга ўзини яхши тушунишга, салоҳиятини ривожлантиришга, ҳаётнинг маъносини уқишга ва ҳаётда ўрнини топишга кўмаклашади. Шунингдек, у ўзини ўзи қадрлай билишга, фикрини эркин баён эта олишга, турмушда учрайдиган мураккаб шароитларда тўғри йўл топишга, мустақил қарор қабул қилишга ва ўз тақдирига масъулият билан қарашга ўргатади. Бу нафақат ўзи учун, балки атрофидагилар учун, жамият, Ватан, бутун инсоният учун муҳим аҳамиятга эга. Буларнинг ҳаёт таълимисиз амалга ошиши амри маҳол. Муаллиф ана шу неъмат, ҳикмат, ибрат бўлган ҳаётий таълим, одоб-ахлоқ ва қадриятларимиз билан боғлиқ масалалар ҳақида баҳоли қудрат фикр юритиб, кўнглидаги ўйларини, мушоҳада ва мулоҳазаларини тақдим этишга жазм қилган. Китоб муҳтарам ўқувчиларимизга кўп жиҳатдан фойдаси тегиб, манзур бўлади деган умиддамиз.