Hurmatli kitobxon, asarni o‘qir ekansiz, beixtiyor ko‘zlaringizga yosh keladi... O‘sha paytlarda ota-bobolarmiz ochlik, qurg‘oqchilik, yo‘qchilikning naqadar dahshatli oqibatlariga duch kelishgan: bir burda non, bir kosa qora sho‘rva uchun kun bo‘yi tinim bilmay mehnat qilgan, to‘yib ovqat yeyishgan kunni bayram hisoblagan (bu achchiq haqiqatga asarning "Shipildoq" bobida o‘zingiz shohid bo‘lasiz)... Asarning asosiy qahramonlari - "qoracha"larga mansub G‘ulomjon ismli yigit va "eshon"larga mansub Hayot ismli qiz. Ular biri-biriga ko‘ngil qo‘ygan. Lekin mutaassib "eshon"larning "qoracha"lar bilan quda-anda bo‘lmaslikka harakat qilishi, "qoracha"dan sovchi kelsa, "Biz qizimizni bermaymiz, bersak, naslimiz buziladi, avlodimizga la’nat yog‘iladi", - deya xurofotlarga ishonishi bu ikki yosh orasida to‘siq bo‘ladi.