Odil Yoqubovning “Diyonat” romani hayotning muhim qirralarini o‘zida jamlay olganligi bilan ham qadrlidir. Bir qarashda roman psixologik asardek tuyuladi. Unda turfa xarakterlarning botiniy ifodasi yetakchilik qiladi. Qahramon hayoti bilan davr voqeligining o‘zaro ziddiyati asar falsafasini diyonat, or-nomus, iymon-e’tiqod kabi insoniy sifatlarning mohiyatini ilg‘ab olishda muhim ahamiyat kasb etadi. Ushbu o‘zaro murosasiz jang shaxsni o‘zligini anglashga da’vat etadi. Badiiy asar shundayki, sof san’at namunasi yillar, asrlar o‘tsa hamki eskirmaydi, har qanday tuzum va davr qobig‘idan yorib o‘tib, odamzod kelajagi uchun beminnat xizmat qilaveradi. Shu ma’noda Odil Yoqubov olamning go‘zalligi, insoniyatning shu go‘zallikka munosabatini, inson qadr-qimmatini o‘z asarlarining milliy ma’naviyat ifodasiga singdiradi.