Одамзот шунчалик қувват, энергияга бойки, улардан фойдалана олса, хазинанинг ўзи бўлади-қолади. Сабаби бу айтаётган бойликларни тўғри йўлга сарфлаш орқали инсон мисли кўрилмаган ютуқларга, зафарларга етиши мумкин. Бугунимизгача етиб келган, ўзининг машҳурлиги, донолиги, заковатию зийраклиги билан довруғ қозонганлар ҳам мана шу омил орқали танилганлар. Қолаверса, яна бир хислат уларни бошқалардан ажратиб туради. У ҳам бўлса, буларнинг ҳаёт чизиғини тўғри чиза билганликларидир. Эгриликдан қочиб, самимият ила дунёдан ўтганларидир. Ушбу китоб мақсадларингизни тўғри белгилашда, ишларингиз ривожи сари интилишингизда асқотади, деган умиддамиз. Зеро, ҳаётингиз тўғри шаклланса, унинг йўллари ҳам, чорраҳалари ҳам сизнинг манфаатингизга хизмат қилади.