Оноре де Бальзакнинг ушбу романида Франциянинг чеккасида жойлашган Сомюр шахрида яшовчи Гранделар оиласи ҳаёти ҳақида ҳикоя қилинади. Ёзувчи Гранделар оиласидаги муҳитни ва бу оиланинг бошқа инсонлар билан ўзаро муносабатларини тасвирлаш орқали ХІХ асрда Францияда яшовчи инсонлар руҳиятини, хаёлотини ва улар ўртасидаги муносабатларни очиб бериш га ҳаракат қилади. Айниқса, жаноб Грандени ва унинг инсонлар билан муомаласини тасвирлаш орқали ушбу давр одамлари табиатида мол-дунёга ўчлик, манфаатпарастлик, муғомбирлик нечоғлик урчиб кетганини маҳорат билан ифодалайди. Шу билан бирга, жаноб Гранденинг жияни Шарл Гранденинг Париждаги инсонлар билан алоқаларини тасвирлаш мисолида мазкур давр Париж киборлари, амалдорлари дунёқарашини ҳам кўрсатиб беради. Асар шу жиҳатлари билан, яъни ХIХ аср Франция киборлари ва оддий халқи руҳияти, маънавий олами, орзу-умидларини кўр-сатиб бериши билан ўта қимматли саналади.