Ushbu to‘plamda o‘zbek jadid ma’rifatparvari Elbekning sara hikoyalari hamda tilshunoslik, metodika, imlo, ona tili darsliklari haqidagi publitsistik maqolalari joy olgan. Uning hikoyalarida milliy qadriyatlar, insoniy tuyg‘ular, jamiyatdagi ijtimoiy o‘zgarishlarning inson taqdiriga ta’siri badiiy tarzda yoritiladi. To‘plamdagi ilmiy-publitsistik maqolalar esa yozuvchining pedagogik qarashlarini, ona tili ta’limi va yozuv masalasidagi ilg‘or fikrlarini aks ettiradi. Ushbu to‘plam muallifning ikki qirrali faoliyati - ijodkor hamda ma’rifatparvar pedagog, tilshunos olim sifatidagi qiyofasini yaqqol namoyon etadi. Shu bois bu kitob adabiyot ixlosmandlari, tilshunoslik, pedagogika va metodika bilan shug‘ullanuvchi tadqiqotchilar, shuningdek, milliy uyg‘onish davri adabiyotiga qiziqqan keng kitobxonlar ommasi uchun qimmatli manba bo‘lib xizmat qiladi.