Gyustav Floberning eng katta romani – «Bovari xonim» fransuz adabiyotining eng mashhur asarlaridan biridir. Bosh qahramon – Emma Bovarining hayoti, turmush tarzi, orzu-istaklari va nixoyat fojiasi haqida hikoya qiladigan ushbu roman aslida nafaqat oʼsha davr, balki hoy-u havasga berilgan ayolning hamma zamon va barcha makonlardagi fojiasidir. Emma nomunosib turmush yoki taqdirning noloyiq jufti sabab oʼz hayotini oʼzgartirish va oʼzicha goʼzal hayot qurish sari intiladi. Boy va kelishgan xushtor ayolga qanchalik baxt bera oladi yoki qadrli va sevikli boʼlish uchun er qanday fazilat va imkoniyatlarga ega boʼlishi lozim? Taqdir yoʼrigʼiga rozi boʼlmagan inson oʼz hayotini qanchalik oʼzgartira oladi? Yoki taqdir insonga qanchalik bogʼliq? Bovari xonim timsolida yengil hayot va qiyinchiliksiz farogʼatdan bahramand boʼlish istagi insonni oxir-oqibat fojiaga, hatto butun oilasining tanazzuliga sabab boʼlishi yorqin tasvirlarda ifodalanadi.