Xayotda faqat halollikni pesha tutgan, Haq yoʻldan chekinmagan «Shoxsanam» romani qahramoni kunlarning birida sudga tortiladi. Ajabki, u oʻzini shunday jazoga munosib deb biladi: «Soʻnggi soʻz berildi. Ikki ogʻiz gapirdim: men shunday jazoga munosibman dedim. Lekin sizlar tiqishtirgan ayblar uchunmas, balki anovi Qonun kitobingizning hech bir moddasida qayd etilmagan jinoyatu xiyonatlarim uchun munosibman dedim...» Darvoqe, inson hayotida hech bir rasmiy hujjatlarda qayd etilmagan azaliy qonun-qoida, aqidalar borki, ularga bepisand boʻlishlikning oqibati halokatlidir. Asar qahramoni oʻz iqrornomasida ana shuni nazarda tutgan edi. Aziz oʻqirman, mana, adib Orziqul Ergash ijodiy bisotidan tanlab tartib berilgan roman, qissa, hikoyalardan iborat yangi kitobi qoʻlingizda. Ishonamizki, undagi bitiklar sizga maroqli mutolaa onlarini tuhfa etadi, koʻngil mulkingizdan chukur joy oladi.