Tinib-tinchimas Bahoraning xohish-istaklari, o'y-kechinmalari, beg'ubor orzulari haqida o'qirkanmiz, bola dunyosining yanada sirli mo'jizalari bilan yuzma-yuz kelamiz. Mehr-u muhabbatga tashna farzandiga go'zal ertaklar to'qigan Ayajon, orzularini kuyga solib alla aytgan Buvijon, Buvajon, Dadajon, Opajon, Ammajon, Xolajonlar, unutmang, jigarbandingiz sizni bor vujudi bilan his qilmogda, sizning issiq yuzingiz u uchun juda qadrli. Bolajonning sizni sog'inishi, siz tomon talpinishi shundan. Charos Rahimqulovaning ushbu ijod mahsuli turmush tashvishlari bilan ovora biz, kattalarni bola qalbiga yanada yaqinlashtiradi.