O'zbekiston xalq shoiri Anvar Obidjon asarlarining aksariyati o'ta quvnoqligi, biri biridan qiziq voqealarga boyligi, ayni chog'da tagzaminida chuqur falsafiy fikrlar yashiringani bilan yosh kitobxonlarni azaldan o'ziga rom qilib kelmoqda. Adibning ichakuzdi hangomalarga yo'g'rilgan Mo'ttivoy haqidagi asari "Yoshlik" jurnalida bosilishi bilanoq katta shovshuvga sabab bo'ldi, bolalar adabiyotiga bag'ishlangan yig'inlarda yuqori baho oldi. Ushbu kitobni o'qigach, bunday ko'tarinki gaplar bejiz aytilmaganiga o'zingiz ham iqror bo'lasiz.